دة شرح منهج العلوم كاملا بالاسئلة على هيئة حكايات دكتورة منى عزام
قصة(١)علوم_الصف الرابع الابتدائي ابو الخفافيش
من ٣ سنين كدا كنت ماشية في الصحرا وكنا بليل. وفجأة. قابلت خفاش فكنت لسة هخاف منه وهبعد بعيد لاقيته نادي عليا وقالي تعالي بس راحة فين انا مبخوفش انتو ليه بتخافو مني برغم (اني مفيد في حياة الانسان والكائنات الحية التانية كمان ) _قولتلو بصراحة انا بخاف منك لحسن تاكلني راح قالي لا طبعا انا مش بتغذي علي البشر انا (بتغذا علي البعوض والحشرات ) فبصراحة ارتحتله لما طمني انه مش هياكلني وقولت اما اقعد اتكلم معاه شوية ....فأول حاجة سألته
-اسمك ايه بقي
=قالي اسمي ابو الخفافيش .وانتي بقي اسمك ايه
-انا اسمي مُني وبعد كدا حوارنا بقي كالاتي
_هو انت بتنام ازاي يا خفاش؟
=قالي انا بنام وراسي لاسفل
-هو انت بتمشي يا خفاش عالارض زينا كدا
=قالي اه بس انا عندي جناحات فعندي القدرة اني اطير
-طب هو انا ممكن اعرف ليه كل ما اخرج اتمشي بليل مش بشوف غيرك من كل حيوانات الغابة؟؟
=بصراحة كدا علشان البشر بتخاف من شكلي فأنا بقيت (كائن ليلي نشاطي بيزداد بليل.)بس
-ايه دا يعني انت بتشوف في الضلمة يا ابو الخفافيش
=لا طبعا انا لا أري ليلا بس بعتمد في رؤيتي علي (صدي الصوت في تحديد الاماكن)
-لا ممكن تفهمني بقي اي صدي الصوت دا يا ابوالخفافيش
=يعني انا بفضل اطلع اصوات طول الليل والصوت دا اما بيخبط ف حاجة اودامي ويرجع يتردلي الصدي بتاعه فبعرف من الصدي انه كدا فيه حاجة اودامي وباخد بالي منها علشان مخبطش فيها .
_واحنا بنتكلم انا والخفاش فجأة حسيت بحاجة بتتحرك جنبي عالارض
وبعدين قولت للخفاش انا خايفة ومش شايفة حاجة ف الضلمة دي
قالي لالا متخافيش دي سحالي الصحراء صحابي وقام معرفنا علي بعض
بدأ الخفاش يتكلم ويقول
_دول بقي سحالي الصحرا عايشين هنا معايا من زمان وفضلت قاعدة بتكلم مع الخفاش والسحالي لحد الشمس ماطلعت الصبح
واول ما الشمس طلعت لاقست السحالي ... قالو للخفاش يلا.سلام يا ابوالخفافيش نشوفك بليل بقي ...و(راحو قعدو في الظل بعد ما ارتفعت درجة حرارة الشمس)
_وبعدين سألتهم انتو بعدتو عن الشمس ليه
_فردت السحلية الكبيرة بتاعتهم وقالتلي علشان احنا بنحافظ علي برودة جسمنا بإننا نقعد في الظل لما بتطلع الشمس وترتفع درجة الحرارة
وطبعا سبتهم ياخدو راحتهم ومشيت علشان اروح بيتنا وفجأة وانا ماشية قابلت حاجة كدا عمالة تتنطط علي الارض وكل شوية تغير لونها وحساها بتهرب من حاجة بس مش عارفة من ايه
المهم قولتلها انتي اسمك ايه ؟
_قالتلي انا الحرباء (او حرباية زي مابتسموني)
وسألتها انتي ازاي بتقدري تغيري لونك كدا كل شوية
_راحت قالتلي طبعا (للإختباء من الاعداء )
.=قعدت معاها وقولتلها لا بقي فهميني بتعملي كدا ليه
قالتلي يعني مثلا لو انا ماشية علي شجرة وعدي من جنبي حيوان كبير بحول لوني للون الشجرة .فالحيوان مش هياخد باله مني ان فيه حاجة غريبة عالشجرة علشان كدا انا دايما بغير في لوني علشان استخبي من الاعداء من اجل البقاء وأقدر اعيش بدون ما حد ياكلني
الدرس الاول_علوم_ الصف الرابع
اكمل :
١_تنام الخفافيش ورأسها الي .....
الاجابة(اسفل)
٢_يزداد نشاط الخفافيش......
الاجابة(ليلا)
٣_تتغذي الخفافيش علي ......و.......
الاجابة(الحشرات والبعوض)
٤_الحيوان الذي يغير لونه حسب المكان الذي يعيش فيه هو ....
الاجابة(الحرباء)
٥_تحافظ السحالي علي برودة جسمها عن طريق البقاء في ..... في درجات الحرارة العالية
الاجابة(الظل)
٦_يعتمد الخفاش علي ......في تحديد المكان
الاجابة(الصدي)
٧_تغير الحرباء. لونها من اجل .....
الاجابة(الاختباء من الاعداء)
قصة(٢)علوم_الصف الرابع
بمناسبة الشتا_هحكيلكم انا عملت ايه الشتا ال فات ...
كنا ف اجازة وحبيت اعمل حاجة مجنونة فقولت انا هروح (القارة الجنوبية). ودي كانت اكتر مناطق العالم برودة البلد عبارة عن جليد بس تقريبا
واحلي حاجة كنت بقابلها هناك هما البطريق طبعا قولت مش هسيبه في حاله لازم اعرف هو عايش هنا ازاي وازاي رجله بتعرف تمشي في الجليد التلج دا
_المهم وقفت بطريق صغنون كدا في وسط الجليد وقولتلو ممكن نتعرف ؟
=قالي طبعا طبعا .. اسمك ايه
-قولتلو انا اسمي مني وانت
=قالي انا بطريق ...بس ايه ال جابك في البلد التلج دي بقي ولا انتي بتقدري تتكيفي عالحياة هنا زيينا
-قولتلو ايه دا انت بتتكيف هنا ازاي انت اساسا قادر تدوس برجلك كدا في الجليد دا ازاي
=راح قالي بصي ياست الكل انا هفهمك ..
مش انا جسمي دا متغطي بالريش .يعني كدا الدم اللي جوه جسمي بيفضل دافي . انا بقي ربنا بيخلي حاجة كدا تحصل جوه جسمي فتفضل كمان رجلي متدفية
_قولتلو ايه الحاجة دي
=قالي الاوعية الدموية اللي بيمشي فيها الدم جوه جسمي بتنقلي الدم الدافي دا لاطراف الاقدام بتاعتي فمش بحس بالبرودة وبتفضل الاقدام دافئة.
_طبعا فرحت جدا اني عرفت ان ربنا سبحانه وتعالي مش بيخلي البطريق يحس بالتلج دا زي مانا مكنتش قادرة استحمله.وسلمت عالبطريق ومشيت ..ووانا ماشية قابلت كائن كبيييير جاي من بعيد .. ولما قرب عليا اكتشفت انه دُب
=وبما اني مبخفش من الحيوانات روحت طبطبت عليه كدا وقولتلو اسمك ايه ؟
_قالي انا( الدب القطبي )
= قولتلو انا عايزة اقولك ان (الفراء الابيض) اللي مغطي جسمك دا شكله تحفة عليك
_قالي دا كمان مفيد مش تحفة بس
=قولتلو لا تعالي نقعد سوا كدا بقي وقولي مفيد ازاي ؟
_راح قالي هو مفيد لسببين
١_السبب الاول : بيساعدني للشعور بالدفء
٢_السبب التاني :اني بقدر( اتخفي للحصول عالفريسة )
=لالا فهمني بقي كدا براحة بتتخفي ازاي يعني
-بصي مش انا لون الفرو بتاعي ابيض ؟والجليد دا كله لونه ابيض .. فلو فيه فريسة معدية بستخبي ف الجليد وكإني جليد زيه مانا نفس لونه فلما الفريسة تعدي مبتاخدش بالها اني موجود وبكدا بعرف احصل عالاكل بتاعي مانا بتغذي عالفريسة
*بس أقولك حاجة يا استاذة انا ليا ٢ اخوات واحد اسمه (الدب الاسود )والتاني
(الدب البني)دول بقي حياتهم عايشين عكسي خالص
_عكسك خالص ازاي ياعم دبدوب بقي
=هما لون الفراء بتاعهم الاسود والبني بيساعدهم عالتخفي بين الاشجار اثناء الصيد
انما ميقدروش يجو يصطادو معانا هنا وسط الجليد دول يتاكلو مننا ..
الدرس الاول:علوم_الصف الرابع
أكمل:_
١_لون فراء الدب القطبي.....
الاجابة(أبيض)
٢_يساعد الفراء الابيض. للدب القطبي علي....
الاجابة( التخفي للحصول علي الفريسة)
٣_الاوعية الدموية تنقل الدم .... الي اقدام البطريق ..
الاجابة(الدم الدافئ)
٤_الدب الاسود والبني يساعدهم لون فرائهم علي ...
الاجابة(التخفي بين الاشجار اثناؤ الصيد)
٥_يعيش كل من البطريق والدب الابيض في ..
الاجابة(القارة الجنوبية)
٦_يعيش .... في القارة الجنوبية اكثر مناطق العالم ببرودة. وتتعرض اقدامه للبرودة بسبب الثلج
الاجابة(البطريق )
قصة(٣)علوم_الصف الرابع
في شهر ٧ السنة اللي فات قررت أقضي يوم في الصحرا علشان اشوف حيوانات غريبة واعرف بيعيشو ازاي في الصحرا دي وبياكلو ويشربو منين ..
صليت الفجر وجمعت كل اغراضي وبدأت رحلتي بإتجاه الصحرا ووصلت بعد ٦ساعات سفرووانا هناك لقطت الصور اللي تحت دي
___________________________(السحالي)
واول مادخلت الصحرا لاقيت في استقبالي كدا سحالي ملونة شكلها قمر اوي قربت منها وبقولها اي الالوان الحلوة اللي مغطياكي دي ؟
_قالتلي دي اسمها(حراشيف ملونة) دا انا بحمد ربنا انها عندي ..._قولتلها ليه هي فايدتها اي
=قالتلي دي الحراشيف الملونة دي بتساعدني عالتخفي بين الصخور الملونة اللي ف الصحرا وبكدا بقدر اتخفي من الحيوانات المفترسة وبقدر كمان اتسلل كدا واتخفب واوصل للفريسة بتاعتي واكل واعيش ..
المهم سلمت عالسحلية وقولتلها هعدي عليكي تاني وانا مروحة
________________________(عناق الارض)
-كملت مشي في الصحرا وكلي فضول اني اشوف أي حيوان غريب تاني انا مشوفتهوش قبل كدا .. المهم قابلت تاني حيوان غريب في اليوم دا.. وقفت ابصله شوية واستنيت يبُصلي
وروحت ضحكتله كدا وقولتله اسم القمر ايه؟
=قالتلي أنا بنت واسمي (عنّاق الارض)
_قولتله وااااو اسمك جميل وغريب بس مين الاطفال الصغيرين دول
=قالتلي دول اولادي وانا برضعهم علشان كدا اسمنا (ثدييات)و كل الحيوانات اللي هتقابليها بترضع صغارها زيينا كدا اسمهم (ثدييات)
_قولتلها اللهدي معلومة حلوة اوي هسجلها عندي. وبعدين قولتلها هو انا ممكن اتصور معاكي علشان لون (فرائك الاصفر )دا عجبني موت يا( عناق الارض)
=قالتلي طبعا تعالي نتصور واقولك علي حاجة بقي انا الفراء الاصفر بتاعي دا (بتخفي بيه من الاعداء في الصحرا ) ووانا باخد معاها الصورة ...لمحت من بعيد حيوان غريب اوي وبعدين سألت عناق الارض مين دا؟. قالتلي دا جاري متخافيش تعالي اعرفك عليه بنفسي ..وفجأة لاقيتها بتنادي
_يااااثعللللللب تعالي هنا عندنا ضيوف
_________________________(ثعلب الفنك)
*جه الثعلب ودخل يقوول ياساااااتر انا مكنتش عايز اشوف بني ادمين النهاردة
_راحت عناق الارض قالتله استني بس دي ضيفة زي العسل وهتحبها تعالي يلا عرفها بنفسك وهسبكم مع بعض شوية
جه الثعلب وبدأ يعرفني بنفسه...
= أنا (ثعلب الفنك) وبعيش في الصحرا هنا ولازم يكون المناخ جاف ..
=وبعدين سألته : هو انت بتلهث كدا ليه؟
_قالي انا بلهث زي الكلاب علشان( احافظ علي برودة جسمي )علشان يفضل جسمي بارد وعايز اقولك علي حاجة ..شايفة ودني الطويلة دي بتساعدني اني افقد الحرارة وابرد جسمي
وكمان عندي فراء بتحميني من الشمس
=قولتله ايه دا انت لازم جسمك يبقي بارد علي طول ياثعلب الفنك
-قاالي طبعا مش انا قولتلك بعيش في صحراء في مناخ لازم يكون جاف
=طب هو انا ممكن اسألك سؤال ياثعلب الفنك انت بتستخبي ازاي من اعدائك في الصحرا الواسعة دي .؟
_قالي يا ست هانم هو انتي مش شايفة (الفراء البني) بتاعي ماهو دا (بتخفي بيه في وسط الصحاري الرملية)اللي انتي شايفاها دي كلهافمفيش ولا فريسة تقدر تاخد بالها مني
_المهم مدلي ايده يسلم عليا وقالي انا مضطر امشي علشان صحابي بيندهو عليا وهو ماشي سألته قولتله هو فيه انواع صحاري تانيه هنا غير دي ؟ _قالي اااه طبعا بس صحرا ثلج اوي اسمها (التندرا) يا ابلة استني اجبلك چاكيت من عندي البسيه واطلعي علي هناك... وبقولك ايه هناك هتقابلي واحد صاحبي اسمه (الثعلب القطبي ) سلميلي عليه وقوليلو (أبو فنك من الصحراء الرملية بيسلم عليك)
_قولتلو عنيا حاضر وخدت منه الچاكيت وطلعت علي صحراء التندرا طوالي
______________________(الثعلب القطبي)
اول ما وصلت هناك لاقيت( الثعلب القطبي) في وشي .
كان لسة جاي يهجم قولتله استني استني انا جيالك من طرف (ابوفنك ) قالي اه ادخلي دا حبيبي .... مين انتي بقي
_قولتلو انا "مني " وانت ؟
=قالي انا الثعلب القطبي
-قولتلو تصدق مكنتش اعرف ان( ودنك وساقك قصيرين) وحلوين كدا
= اه انتي جاية تعاكسيني بقي يا استاذة دول قصيرين كدا علشان (يساعدوني عالدفء) في وسط التلج اللي الواحد قاعد فيه دا
_فسألته : هو انا ممكن احط ايدي عالفرو بتاعك لانه شكله حلو اوي و(كثيف) فقالي اه طبعا كثيف علشان (بيساعدني اصطاد في الثلج دا واقدر اتسلل كدا واوصل للفريسة)
=طب ممكن يا ثعلب يا قطبي يا قمر انت تقولي انت بتتغذي علي ايه ؟
_راح قالي نفس اللي بيتغذا عليه ابوفنك اللي انتي جاية من عنده
=طب تصدق اني نسيت اسأله بيتغذا علي ايه
_راح قالي بصي يا ست هانم
انا وثعلب الفنك يعتبر بناكل كل انواع الغذاء الموجود حتي الحشرات مش سايبنها ف حالها .وفاكهة بناكل _جذور نبات برضو بناكل وحتي بقايا الطعام اللي باقية من فريسة اي حيوان تاني ....بقولك ايه يا استاذة انا عطشان انا هروح اشرب من البحيرة اللي هناك دي تيجي معايا ولا مش عايزة
=طبعا طبعا هاجي معاك..
____مشينا سوا وفضلنا نتكلم لحد ماوصلنا_
اول ما وصلنا طلعلنا قرش من البحيرة
__________________________(قرش الثور)
=طبعا انا خوفت ورجعت لورا كدا وراح الثعلب القطبي قاله ايه يا( قرش الثور. ) حد يخض حد كدا .... مابراحة ياعم معانا ضيف
_رد قرش الثور وقاله انا افتكرت حد غريب ياعم . انت جاي تشرب ولا ايه .وبعدين هو مفيش غير الماية اللي انا عايش فيها ياعم اللي بتحب تيجي تشرب منها ؟!
=رد الثعلب وقاله ياعم مانا بروح عند الماية العذبة بلاقيك -اروح عند المالحة برضو بلاقيك
-رد القرش وقاله مانت عارف يا باشا (انا جسمي بيقدر يتكيف عالحياة في الماية العازبة والمالحة). واهو ياعم بنروح هنا شوية وهنا شوية عشان نعرف نصطاد
*طبعا انا دخلت فالحوار. علي طول وسألته. _بقولك يا قرش الثور هو انت بتصطاد ازاي ؟
=رد وقالي دي طريقة تخفي. كدا يا ست هانم اسمها (التباين اللوني) بس متقوليش فهمني عشان انا. نازل تحت الماية دلوقتي مش بقدر اقف في. الهوا كتير
ونزل تحت الماية وسابنا واقفين وانا استأذنت من الثعلب القطبي وقولتله اني لازم امشي وجه وصلني لاول الطريق وسابني ومشي وروحت. ركبت عربيتي واول حاجة عملتها طلعت ورقة وقلم وبدأت اسجل كل الملاحظات اللي اكتشفتها في رحلتي
(اول ملاحظة) كتبت ان كل حيوان بيتكيف بطريقة مختلفة في البيئة بتاعته
وكتبت اول تعريف للتكيف
التكيف :هو تغير يحدث بمرور الزمن ويساعد الحيوانات علي البقاء
وبعدين كتبت انواع التكيف :_
١_التكيف التركيبي(الجسدي): هو يحدث داخل جسم الحيوان
٢_التكييف السلوكي:_هو التغير الذي يطرأ علي سلوك او تصرف مجموعة من الحيوانات
الدرس الاول_علوم_الصف الرابع_التكيف:
اكمل :_
١_السحالي الملونة لها حراشيف ملونة تساعدها علي ......
الاجابة:(التخفي من الاعداء بين الصخور الملونة في الصحراء)
٢_تُغطي السجالي الملونة بقشور تسمي.....
الاجابة:(خراشيف)
٣_عناف الارض هي من انواع الحيوانات التي تسمي ......
الاجابة(الثدييات)
٤_تستخدم عناق الارض ......للتخفي من الاعداء في الصحراء
الاجابة(الفراء الاصفر)
٥_يقوم ثعلب الفنك ب..... للحفاظ علي برودة جسده. الاجابة(اللهث)
٦_تساعد...........لثعلب الفنك علي حفظ برودة جسده. الاجابة(الاذن الطويلة)
٧_يستخدم ثعلب الفنك ......للتخفي من اعدائه
الاجابة( فرائه البني)
٨_يعيش الثعلب القطبي في صحراء........
الاجابة (التندرا)
٩_يتميز الثعلب القطبي بالقدم والاذن.......
الاجابة(القصيرتين)
١٠_يتغذا كل من الثعلب القطبي وثعلب الفنك علي .......
الاجابة(جميع أنواع الغذاء)حتي الحشرات والفاكهة
١١_يعتمد الثعلب القطبي علي .... للتسلل واصطياد الفريسة
الاجابة(الفراء الكثيف)
١٢_جسد قرش الثور يستطيع ان يتكيف في المياه ........و.......
الاجابة(العذبة والمالحة)
١٣_يقوم قرش الثور باصطياد فريسته بالاعتماد علي طريقة تخفي تسمي......
الاجابة(التباين اللوني)
بم تفسر:تغطي السحالف بحراشيف ؟
_لكي تستطيغ التخفي من اعدائها في الصخور الملونة في الصحراء وتصطاد فريستها
_قارن بين التكيف الجسدي والسلوكي .
قصة رقم(٤)علوم الصف الرابع
منذ سنتين اخدت اجازة من شغلي وقررت اسافر غابات الساڤانا لاني كان نفسي جدا اشوف الاشجار اللي هناك
في يوم في عز الشمس خدت زميلتي ندي وقررنا نطلع عالغابات وجهزت الكاميرا بتاعتي وشوية حاجات كدا علشان تكفينا نقعد هناك يوم كامل هناك
أول مادخلنا الغابة بدأنا نبص يمين وشمال لاحظنا ان كل مكان واصلاله الشمس طالع فيه نبات ... ففتحت المُذكرة بتاعتي اللي قررت اكتب فيها كل حاجة هلاحظها في الرحلة دي
وكانت اول جملة
_(تنمو النباتات في كل مكان تصل إليه الشمس حتي لو في قاع جليد بحري )
وبعدين كملت مشي في الغابة وانا مستمتعة جدا بالاشجار العملاقة اللي شايفاها حوااليا وفجأة سمعت شجرة كبييييرة
بتقولي يااااا امورة يااللي هناك تعاااالي هنا
________________________١_شجرة السنط
بصيت ورايا لاقيتنا شجرة كبيرة اوووي
_قولتلها انا مني ودي زميلتي ندي
=ردت وقالتلي يااااااه بقالنا كتير محدش جه يزورنا ويعرف يتكلم معانا كدا
-قولتلها انا دارسة لغة النبات كويس اوي
=قالتلي اعرفك بنفسي انا(شجرة السنط الم المُظِلة )
_قولتلها طبعا عارفاكي هو في حد ميعرفكيش
=قالتلي ايه دا عرفتيني منين
-قولتلها طبعا من الاوراق الصغيرة اللي عالقمة بتاعتك اللي بتعمل كمظلة علشان تمتص اشعة الشمس واللي يقعد تحتك يحس بضلة
=قالتلي وكمان انا مش بمتص اشعة الشمس علشان اظلل عاللي هيقعد تحتي بس دا كمان علشان اقوم بانتاج الغذاء بتاعي
-قولتلها تماام ألف هنا يا شجرة السنط
بس هو انا ممكن اعرف بقي لما بتحبي تخزني الماية بتاعتك بتخزنيها فين ،؟؟
=قالتلي طبعا في الساق (الجزع)بتاعتي وخدي بالك انا علشان بخزن االماية بقدر اتحمل الجفاف ودرجات الحرارة العالية
-وبعدين وطيت راسي شوية وانا بكلمها وقولتلها انا مش قااااادرة ابصلك فوق تاني يا شجرة السنط انتي طويلة اوووووي
=قالتلي دا انا بقول الحمد لله ان انا شديدة الارتفاع كدا وكمان فيه شوك حوالين الورق بتاعي
-قولتلها ليه بس كدا
=قالتلي علشان دا منع حيوانات الغابة انها تاكل ورقي بس بيني وبينك محدش بيطولني غير الزرافة
-وبعدين بقولها ممكن تديني ورقة منك ذكري
=قالتلي لالا اوعي تاخدي من ورقي دا انا الورق بتاعي بيفرز سُم علشان امنع الحيوانات انها تاكل مني بيخااافو من السم بتاعي طبعا
-وبعدين بقولها هو انتي مش بتخافي يا سنط لحسن يجي حيوان يهجم عليكي يوقعك
=قالتلي نعمم ؟؟ اخااف ايه دا انا ليا جذور وتدية تصل ل ٣٥ متر تحت الارض دا الجذور دي هي اللي مثبتاني في الارض وبصراحة كدا الحمد لله برضو ان جذوري طويلة علشان بقيت بعرف اوصل للماية اللي تحت الارض واشرب منها بسهولة
_وبعدين فجأة وانا واقفة شميت رائحة كريهة جدا فقولت ايييه الريحة دي وببص حواليا
=ضحكت شجرة السنط المظلي بصوت عالي وقاالتلي دي رائحة كريهة انا اللي بطلعها علشان ارسلها لصحابي اللي هما شجر السنط اللي زيي فهما كمان بيخرجو نفس الرائحة
_فسألتها يعني انتو بتتواصلو مع بعض بالرائحة دي
=قالتلي بالظبط كدا لان اكيد محدش مننا هيسيب مكانه علشان يروح يسلم علي شجرة سنط تانية
_وبعدين استأذنتها وقولتلها طب بصراحة كدا يا سنط انا حبيتك بس مش هقدر اقعد معاكي اكتر من كدا مم الريحة
=قالتلي انا مبسوطة اني شوفتك وابقي خلينا نشوفك تاني
_خدت صحبتي ومشينا بعيد عن شجرة السنط
وبعدين لاقيت ندي بتقولي. بقولك ايه انا هموت واروح غابات الامازون دي
=بصيتلها كدا وقولتلها ايييه عايزة تروحي غابات الامازون الممطرة؟
_______________________٢_شجرة الكابوك
_قالتلي عشان خاطري نفسي اروح لان فيه هناك شجرة هموت واشوفها بيقولو انها طوووويلة جدا بيصل طولها ل اكتر من ٧٠ متر
= انا بصراحة سمعت الرقم دا وقولتلها يلااااا بينا علي غابات الامازون المطيرة
بعد ٧ ساعاات. سفر وصلنا للغابات
وفعلا شوفنا اطول شجرة شوفناها ف حياتي
وجرينا لحد عندها وبأعلي صوتي قولتلها اززززيك يا( كابوك )
_طبعا الشجرة بصيت عليها وهي مصدومة مين اللي بينادي عليها دا وكمان عارف اسمها
=ردت وهي مكشرة كدا بتقولي مين حضرتك وعرفتي منين ان انا شجرة الكابوك
-قولتلها طبعا عارفاكي وجايالك مخصوص ياكابوك هعرفك بينا انا مني ودي ندي صحبتي
$وبعدين ندي قاالت الله ايه الريحة الحلوة اللي هنا دي
=ردت شجرة الكابوك وقالت انا اللي بنشر رائحة ازهاري علشان اجذب الخفافيش ناحيتي
-وهنا قولتلها ممكن تديني ورقة من ورقك الحلوة دي ياكابوك
=قالتلي طبعا طبعا اتفضلي وحدفتلي ورقة من اوراقها
&واول ما الورقة نزلت علي ايدي لاقيتها شبه كف ايدي بالظبط
_وبعدين بقول لشجرة الكابوك ايه الجمال دا انتي اوراقك تشبه راحة اليد
=قالتلي طبعا يا مني انا ليا عروق شبكية تشبه راحة اليد ودا علشان اسمح للهوا او الرياح انها تعدي بين اوراقي
-بصيتلها جامد كدا وقولتلها بتخلي الهوا يعدي بين اوراقك انتي مبتخافيش لحسن الهوا يوقعك يا كابوك؟
_قاالتلي لاطبعااا مفيش كابوك بيخاف لان احنا لينا جذور قوية وناعمة بتنمو إلي اعلي فبتقدر الجذور دي تثبتني في الارض سواء كانت الارض دي طينية او رملية
$وبعدين حسيت ان انا طولت عليها في الكلام وكمان الجو هيليل علينا. انا وندي فقولت لندي بقولك ايه يلا بينا نمشي علشان غابات الامازون هنا مش امان خااالص وانا خايفة
_ندي بصيتلي وقالتلي طب ارجوكي كمان نص ساعة بس نتفرج علي باقي الغاية وتكلمي. الاشجار اودامي شوية انا بحب اشوفك اوي وانتي بتتكلمي معاهم
$مرضيتش ازعل ندي وقولتلها بس هي نص ساعة وبس
_________٣_شجرة الصنوبر والتين الشوكي
&فضلنا ماشيين في الغابة وكل شجرة نقابلها نرمي عليها السلام. فأول شجرة قابلناها
_كانت فروعها قصيرة ومليانه شوك كدا اوراقها
ف ندي سألتني هي الشجرة دي مليانة شوك كدا ليه ؟
$فجأة لاقينا الشجرة بترد وبتقولها
=انا شجرة الصنوبر والشوك اللي عليا دا ياقمر علشان امنع الحيوانان انها تاكلني
_رديت علي شجرة الصنوبر وقولتلها بتفكريني بشجر التين الشوكي برضو قصير وفيه شوك علي اوراقه علشان يمنع الحيوانات من انها تاكل اوراقه
-ولسة ندي كانت هتقف تتكلم مع الشجرة سحبتها من ايدها وقولتلها باقي ربع ساعة يلااااا
___________________________٤_النخل
&كملنا مشي انا وندي وقابلنا نخلة ليها جذور طويلة وندي كالعادة سألتني هي ليه جذورها طويلة كدا قولتلها طبعا كل النخل جذوره طويلة علشان الطول دا بيساعده عالصمود أمام الرياح الشديدة
______________٥_زهرة اللوتس والمانجروف
وبعد كدا النص ساعة خلصت. وقولت لندي يلااااااا الوقت خلص في الغابة لازم نروح حالا
ووانا لسة بتكلم سمعت صوت ماية جنبنا
وبنبص لاقينا طالع منها زهور وقامت ندي بصيت جامد عالزهور دي وفضلت واقفة تقولي الله
طب ٥ دقايق كمان نتعرف عالزهور دي
طب ٥ دقايق كمان نتعرف عالزهور دي &وكالعادة ميهونش عليا زعل ندي
_روحنا لحد الزهرة وقولتلها مساء الخير
ممكن ناخد من وقتك دقيقة
_ابتسمت الزهرة وقالت طبعا طبعا انا زهرة اللوتس وعلشان انا بعيش في الماء فصحابي طلعو عليا لقب(زنبق الماء)
*فأنا ابتسمت وقولتلها اسمك رائع بس هي الماية دي مش ممكن توقعك بسهولة لو جه موج عالي ولا حاجة
_قالتلي لا طبعا انا ربنا خلقني زي شجرة المانجروف ليا جذور طويلة علشان تثبتني في التربة اللي تحت الماية دي
= قولتلها وشجرة المانجروف دي ليها جذور طويلة ليه
_قالتلي لا دي بقي علشان تحميها من الامواج العالية
&وهنا الليل ليل 
بصيت لندي وقولتلها يعني ينفع كدا اهو دا اللي كنت خايفة منه
بصيت لندي وقولتلها يعني ينفع كدا اهو دا اللي كنت خايفة منه راحت ندي قالتلي يانهاري وانا عليا واجب لل المدرسة ولسة محلتهوش وعندي بكرة مدرسة هنروح ازاي دلوقتي
طلعتلها الكشاف وقعدنا علي جنب نحل :
الدرس التاني_ اكمل
١_تنمو النباتات في اي مكان.....
(تصل اليه الشمس )
٢_الشجرة التي تتميز بوجود اوراق صغيرة علي قمتها تمتص الشمس تسمي .....
(شجرة السنط المظللة)
٣_تفرظ اوراق ..... سُما لكي تمنع الحيوانات من اكلها
(شجرة السنط)
٤_تنمو غابات الامازون المطيرة في .....
البرازيل
٥_النخلة لها جذور طويلة تساعدها علي ...
(الصمود امام الرياح الشديدة)
٦_شجرة الصنوبر فروعها قصيرة ويملئها الشوك لكي .....
(تمنع الحيوانات من اكلها)
٧_زهرة اللوتس تسمي ..... وتعيش في الماء
(زنبق الماء)
القصة الخامسة
قصة (٥)علوم_الصف الرابع الابتدائي
من سنة وشهرين بالظبط كنت في بعثة في اليابان وكنت مع فريق عمل مكتشف جهاز جديد . اسمه جهاز كشف الخبايا
الجهاز دا كان بيتحط جوه أي حاجة ويقولك ايه اللي بيحصل جواها
_وأنا كان عندي فضول أعرف ايه اللي بيحصل للطعام من اول ما يدخل فم البني ادم ففكرت اخد الجهاز دا يومين اثناء البعثة بتاعتي واحط الجهاز دا مع الطعام وادخله جوه فم بني ادم والجهاز يحكيلي ايه اللي هيشوفو جوه
_وانا بحكم شغلي كدكتورة فأحضرت أحد المرضي للعيادة بتاعتي وقررت استأذنه اني اجرب عليه الجهاز
$جه واحد اسمه عم رجب وقالنا جربو عليا انا الجهاز .وبالفعل حطينا الجهاز جوه سندوتش (طعام) وقام عم رجب حاطط السندوتش في بوقه
_دخل الطعام وجواه الجهاز في (فم) عم رجب وكانت المفاجأة .
لاقينا الجهاز بيتكلم فعلا ...وسمعناه بيقول
_اهلا وسهلا بكم انا الروبوت الياباني واحدثكم الان من فم عم رجب.
=رديت وقولتله ازيك يا روبوت انا دكتورة مني ممكن يا روبوت تقولنا ايه اللي هيحصل عندك للطعام اللي معاك دا
_ رد وقالي حاضر هقولك ... دلوقتي هتبدأ رحلة الطعام في الجهاز الهضمي لعمو رجب انا شايف عندي هنا أول حاجة في الجهاز الهضمي لعم رجب هي الفم ..
= وسألته :انت شايف ايه في الفم دا يا روبوت
_قالي شايف دلوقتي اسنان ولسان
=سألته تاني ودول بيعملو ايه عندك في الطعام ؟
_رد وقالي دول مسكو الطعام طحنوه علقة موت يا دكتورة ورشو عليه ماية غرقوه .
=طبعا انا ضحكت وقولتلوو لا يا روبوت
الاسنان واللسان بيقومو بطحن الطعام ويفتتوه لاجزاء اصغر ويخلطوه بحاجة اسمها اللعاب (الماية) واللعاب دا يرطب الطعام ويفتته
_وبعد كدا الروبوت وقفني من الكلام وقالي استني استني يادكتورة الطعام نازل من الفم دلوقتي في حاجة شبه الانبوب كدا وفيه عضلات..وبعد ما عدا من الانبوب بيخبط علي بوابة مكتوب عليها المعدة
=رديت وقولتلو يا روبوووت والله انت عسل . الانبوب اللي فيه عضلات دا اسمه المرئ وبينقل الطعام من الفم للمعدة
_فجأة لاقيته بيقولي يادكتوووورة الحقي المعدة فتحت بابها دلوقتي انا هدخل جوه مع الطعام بقي باي باي
=عليت صوتي وقولتلو ماشي يا روبوت ادخل بس خد بالك من العصارة الهاضمة اللي هتقابلك جوه
&وقعد الروبوت جوه المعدة دي عدة ساعات وخرج يصوت ويقولي ...
_يا دكتوووورة الحقيني دا انا كنت هموت جوه المعدة.
قولتلو ليه بس يا روبوت ايه اللي حصل
_قالي يادكتورة كان فيه جوه المعدة العصارة الهاضمة اللي قولتيلي خد بالك منها دي مسكت الطعام خليته ماية يا دكتورة
=ضحكت وقولتله اتكلم براحة طيب يا روبوت خد نفسك الاول.. فعلا الطعام بيقعد عدة ساعات في المعدة اللي بيكون فيها العصارة الهاضمة دي وبتحول الطعام لسائل علشان كدا قولتلك وانت داخل المعدة خد بالك يا روبوت ....
_ رد وقالي يارب ما اقابل عصارات تاني في جسم عم رجب دا يا دكتورة عشان انا تعبت خالص النهاردة
=قولتلو لا للاسف لسة هتقابل عصارتين تاني
&ولسة مكملتش الجملة ولاقيت الروبوت بيصوت وبيقولي: الحقيني يا دكتووورة
فيه اودامي نفق كبيييير اوي طوله يجي ٦ متر انا خايف اتزحلق
=رديت وقولتلو جمد قلبك يا روبوت انت داخل دلوقتي عالامعاء الدقيقة
_رد قالي ودي هتعمل فيا ايه يا دكتورة انتي خوفتيني
=قولتلو بصراحة حقك تخاف دا انت هتقابل جوه الامعاء الدقيقة دي عصارتين
_يانهاري يادكتورة عصارتين مرة واحدة دا انا لسة مفوقتش من العصارة الهاضمة اللي كانت في المعدة
_قولتله معلش يا روبوت استحمل خلاص هانت
&وفعلا دخل الروبوت جوه الامعاء الدقيقة مع الطعام وقعدت مستنياه يخرج ...
$وبعد شوية خرج الروبوت بس المرة دي لوحده الطعام مخرجش معاه زي كل مرو .بس خرج وهو بيصوت من اللي حصله جوه الامعاء الدقيقة وبيقولي
_ينفع كدا يا دكتورة اللي حصلي هنا دا انا فجأة لاقيتني في الامعاء الدقيقة اللي طولها ٦ متر دي وقابلت جوه الامعاء الدقيقة عصارتين
"عصارة الكبد" وعصارة البنكرياس
وقامو العصارتين دول مسكو الطعام حللوه لمواد غذائية
وفجأة ببص حواليا يا دكتورة ملقتش الطعام لاقيت مواد غذائية بس متحللة
=رديت وقولتله و المواد الغذائية دي راحت فين يا روبوت
_رد وقالي ...فجأة يا دكتورة لاقيت المواد الغذائية دي بتمشي في حارة ضيقة اوي كدا اسمها شعيرات دموية وراحت للدم بتاع عم رجب وقام الدم دا يا دكتورة ماسك المواد الغذائية دي وموزعها لاجزاء جسم عم رجب كلها
= قولتله اااااه علشان كدا خرجت لوحدك يا روبوت لان الطعام اتهضم اكتر في الامعاء. الدقيقة دي وبقي عبارة عن مواد غذائية والمواد دي انتقلت من خلال الشعيرات الدموية راحت للدم والدم دا وزعها لكل انحاء الجسم صح كدا يا روبوت؟
_صح الصح يا دكتورة بس في حاجة عايز احكيلك عليها بيني وبينك
=اتفضل طبعا يا روبوت فيه ايه اللي حصل
_قالي يا دكتورة واحنا جوه فيه شوية طعام كدا متهضموش كويس بس دول بقي لاقيتهم رايحين يخبطو علي باب مكتوب عليه الامعاء الغليظة وراحت الامعاء الغليظة دي فتحتلهم وراحت سحبت من الغذاء غير المهضوم دا السوائل وطردته من البوابة التانية المكتوب عليها فتحة الشرج.
= رديت عالروبوت وقولتله دي امعاء غليظة اوي بجد ازاي تسحب من الغذاء الغير مهضوم دا السوائل وتطرد الطعام كدا من فتحة الشرج
_رد الروبوت وقالي يلا الحمد لله يادكتورة اني مدخلتهاش هي كمان الامعاء الغليظة دي كان زماني هخرج مطرود من جسم عم رجب رجعيني اليابان تاني يادكتورة
الدرس التاني _الجهاز الهضمي _الجزء الاول_ أكمل
١_يبدأ هضم الطعام في ......
الاجابة(الفم)
٢_الجهاز ..... يقوم بتفتيت الطعام الي اجزاء صغيرة
الاجابة(الهضمي)
٣_العضو الذي يظل الطعام به لعدة ساعات هو
الاجابة (المعدة)
٤_يتم هضم الطعام في المعدة بواسطة ....
الاجابة: ( العصارة الهاضمة)
٥_يتم هضم الطعام في الامعاء الدقيقة بواسطة ......
الاجابة (عصارة الكبد وعصارة البنكرياس)
٦_العضو الذي يمتص السوائل من الطعام غير المهضوم يسمي .....
الاجابة( الامعاء الغليظة )
٧_العضو الذي يتحول فيه الطعام الي مواد غذائية ثم ينتقل الي الدم
الاجابة( الامعاء الدقيقة)
٨_تنتقل المواد الغذائية الي كل انحاء الجسم بواسطة ......
الاجابة(الدم)
٩_يتم طرد الطعام غير المهضوم خارج الجسم من خلال .......
الاجابة(فتحة الشرج)
قصة(٦)-علوم-الصف الرابع
في سنة ٢٠٠١ كنت لسة في تالتة ابتدائي والمدرسة بتاعتي عملت مسابقة وكانت هتختار فيها اكتر طالب عنده موهبة مختلفة وتكسب الطالب دا ميدالية ذهبية
كل الطلبة اللي قدمت في المسابقة بدأت تقدم مواهبها في الاذاعة المدرسية و كان منهم اللي عنده موهبة الغناء ومنهم اللي عنده موهبة التمثيل ودي كانت حاجات عادية مش مختلفة خالص بالنسبة لميس "إيمان" مديرة المدرسة وانتهي تقديم العروض ...
والطلبة واقفين حاسين انهم هيخسرو لان المواهب مش مختلفة زي ما ميس ايمان عايزة وكلنا واقفين في الاذاعة مستنين المديرة تعلن عن النتيجة بإسم الفايز .
وفجأة طلع طالب اسمه إياد من الطابور واتكلم بصوت عالي والكل ساكت و قال لمديرة المدرسة : _ياميس انا عندي موهبة
اعتقد انها مختلفة
_ردت المديرة وقالتله :بس انت يا حبيبي مقدمتش في المسابقة .وخلاص المسابقة انتهت
=رد " إياد" وقالها : ارجوكي يا ميس اديني فرصة وقرري بعدها ان حضرتك تنهي المسابقة
_وبالفعل وافقت المديرة ان إياد يعرض موهبته في الاذاعة المدرسية أمام كل الحاضرين
= واذا فجأة إياد يطلع يجري برة باب المدرسة والكل واقف مذهول من اللي حصل ..وبعد مرور دقتين لاقينا إياد راجع ومعاه كلب وبقرة وجمل
كل اللي في المدرسة كانو بيبصو مصدومين ومش فاهمين فيه ايه
_ وبعد كدا إياد وقف الكلب والبقرة والجمل جنب بعض. .. .
والمفاجاه الكبيرة لاقينا ان إياد بيكلم ال ٣ حيوانات وبيردو عليه وكإنهم بني ادمين
وبدأ إياد العرض بتاعه امام كل الحضور
إياد: قال للكلب افتح بوقك كدة ولاقينا الكلب سمع كلام إياد وفتح بوقه فعلا وسأله اياد ..هي نوع اسنانك دي ايه؟
رد الكلب وقال : انا أسناني حادة
وسأله اياد: وليه أسنانك حادة بقي ؟؟
قاله :لإني باكل اللحوم طبعا يا إياد
فأكيد يعني هحتاج اسنان حادة علشان اقدر امضغ اللحمة،
وسأله إياد : وعلي كدا بقي انت عندك كام معدة عشان تقدر تهضم اللحمة اللي بتاكلها
_رد الكلب وقاله: انا عندي معدة واحدة يا اياد لان كدا كدا اللحمة سهلة الهضم فهحتاج معدة واحدة اهضمها بيها
وفجأة وإياد بيكلم الكلب ..لاقينا البقرة بتقول لإياد .:_ ايه ياعم اياد هو انت هتفضل موقفني كدا كتير انا تعبت من كتر الوقفة
_رد إياد عالبقرة :وقالها خلاص خلاص متزعليش يلا نبدأ العرض معاكي
*وبدأ اياد يكلم البقرة واول حاجة قالهالها ..
_يلا افتحي بوقك كدا وريني سنانك
_فتحت البقرة بوقها وقام اياد قالها :_ايه دا هو انتي سنانك متساوية كدا ليه
*قالتله علشان انا باكل العشب .. ولو سناني مش متساوية العشب هيفضل يدخل بين الاسنان ومش هعرف اكله
_ورد إياد قالها : ايييه!؟ انتي بتاكلي العشب ا العشب صعب الهضم ..ياتري انتي عندك كام معدة بقي علشان تهضمي العشب دا ياست هانم ؟؟
ردت البقرة وقالتله انا الجهاز الهضمي بتاعي فيه( اكتر من معدة علشان تقدر تهضم العشب) لانه فعلا صعب الهضم زي ما قولت يا اياد..
وبعد كدا مديرة المدرسة قالت خلاص الوقت انتهي يا اياد...
وفجأة الجمل اتكلم وقال :شكرا شكرا يا إياد انت شكلك جبتني هنا عالفاضي
_قام إياد مرضيش يزعل الجمل وقال يسأله اي سؤال بسرعة..
فسأل إياد الجمل : هو انت يا جمل بعد ما بتهضم الطعام بتخزن الدهون اللي كانت في الطعام فين ؟
_رد الجمل وقاله بخزنها في( السنام )
_وهنا اطلقت المديرة صفارتها للاعلان عن موعد انتهاء العرض التقديمي ..
وفضل الطلبة واقفين مستنين النتيجة بفارغ الصبر ..
وبعد مرور ساعة الا ربع جه وقت اعلان النتيجة .
.وطلعت المديرة وقالت : الفائز في هذه المسابقة هو الطالب "إياد " لان موهبته هي الموهبة المختلفة الوحيدة في كل المتقدمين للمسابقة فهو عنده قدرة علي التحدث مع الحيوانات وفهم لغتهم
وسألت المديرة "إياد" : ممكن تقولنا يا اياد ليه اختارت تتكلم مع الكلب والبقرة بالذات؟؟
= رد إياد وقالها: لان الجهاز الهضمي للانسان يشبه كثيرا الجهاز الهضمي للبقرة والكلب..
وذهبت المديرة بإتجاه إياد لتسليمه الميدالية الذهبية
الدرس(٢)_الجهاز الهضمي_الجزء الثاني
أكمل :
١_الحيوان الذي يتميز بأسنانه الحادة لاكل اللحوم هو......
الاجابة:(الكلب)
٢_تخزن الجمال الدهون في.....
الاجابة(السنام)
٣_اسنان الكلب حادة لانه يأكل......
الاجابة(اللحوم)
٤_اسنان البقرة متساوية لانها تأكل...
الاجابة:(العشب)
٥_الجهاز الهضمي للانسان يشبه كثيرا الجهاز الهضمي ل.... و ......
الاجابة (الكلب_البقرة)
السؤال(٢)علل:
١_الجهاز الهضمي للبقرة طويل وبه اكثر من معدة؟.علل.....
لكي تستطيع هضم العشب لانه صعب الهضم
٢_اسنان الكلب حادة ؟علل.....
لكي يستطيع أكل اللحوم
تعليقات
إرسال تعليق